Hernaniar gutxi geratuko ziren atzoko egunez dantzaririk ikusi gabe. Euskal Herriko 25 taldetik gora elkartu zituen Dantzari Egunak, kaleak, auzoak eta txokoak koloreztatzeko asmoz. Goizean zehar auzoz auzo kalejiran ibili ziren dantzariak; zerura begira pasatu zuten askok goiza, baina, zorionez, eguraldia lagun izan zuten ikuskizunak iraun bitartean.
Talde txikitan herri osoa zeharkatu ondoren, Gudarien plazan egin zuten urteroko ekitaldi nagusia. Fermina Billanueva, Maria Carmen Mateo, Mirentxu Egizabal, Elurtxo Etxeberria eta Juani Tejedor irrintzilariek egin zieten ongietorria dantzariei, eta Iker Ormazabl 'Tturko' eta Ekan Tolaretxipi bertsolariak arduratu ziren ekitaldiari hasiera txukuna emateaz.
Segituan hartu zuten lekukoa eguneko protagonistek. Musikari finenen laguntzaz, Agintari dantza, Agurra, Muxikoak, Mutildantzak, Fandangoa, Arin arina eta Larrain dantza dantzatu zituzten. Dantzarako ez ezik, emanaldia ikusteko jende ugari elkartu zen Gudarien plazan.
Lanak ondo beteta, deskantsurako eta festarako tartea hartu zuten dantzariek. Atsegindegin egin zuten bazkaria, eta erromeria izan zen arratsaldean.
Erakusketa, hitzaldia eta Dantzari Txikien irteera
XXVI. Dantzari Asteak jarraipena izango du aste honetan. Bihar Euskal Jantzien erakusketa zabalduko dute; ostegunean hitzaldia eskainiko du Ramon Garciak; eta larunbatean izango da Dantzari Txikien Eguna.
