Euskal eta galiziar dantza, asteburuan Basurtun

Bihartik igandera bitartean, Euskal Herriko eta Galiziako folkloreek beteko dute programa

Galiziako Colexiata do Sar folklore taldearen parte hartzea izango da, eta Galiziako musikaz, dantzaz eta antzinako tradizioez beteko ditu Basurtuko kaleak. Duela 35 urte sortu zen elkarteak dantza saila, musika saila eta abesti tradizionalak eskaintzen dituen abesbatza ditu, 60 pertsona baino gehiagok osatutakoak. Horrez gain, dantza eta musika eskola ere baditu, lau urtetik aurrerako umeentzat.

Basurto Berri merkatarien elkartearen laguntza duen ekimena ostiralean hasiko da, Durangoko (Bizkai) Sugarri fanfarrearen kalejirarekin. Ondoren, musika animazioa eta berbena egongo dira, Natatxe taldearekin. Egitarauko jarduera gehienak larunbatean izango dira. Programa 12:00etan hasiko da, Beti Jai Alai eta Colexiata do Sar taldeek buruhandiekin eta erraldoiekin batera egingo duten kalejirarekin. Arratsaldez, 18:30ean, beste kalejira bat izango da, gauera arte luzatuko dena, eta 19:00etan, Beti Jai Alai eta Colexiata do Sar taldeek emanaldia eskainiko dute elkarrekin. Jardunaldia amaitzeko, Orquesta Iris eta Mago Linaje izango dira.

Egitarauak igandean jarraituko du, 12:00etan, euskal folkloreko txikien taldeei arreta berezia eskainiz. Aita Donostia plazan izango dira, kalejiran auzoko beste leku batzuetatik igaro ondoren. Umeen dantza emanaldian talde hauek hartuko dute parte: Itxas Argia (Getxo), Etorki (Ugao-Miraballes), Mendi Alde (Santurtzi), Urdaibai (Forua) eta Beti Jai Alai.