Edukira salto egin | Salto egin nabigazioara

Tresna pertsonalak
Hemen zaude: Hasiera › Hemeroteka › Euskal dantzen hiriburu izango da Hondarribia asteburu osoz

Dokumentuaren akzioak

Euskal dantzen hiriburu izango da Hondarribia asteburu osoz

VIII. urtea beteko du aurten Kemen Dantza Taldeak eta Hondarribiko Udaleko Kultura departamentuak antolatzen duten Hondarribia Dantzan jaialdiak. Asteburu osoan euskal dantzen hiriburu izango da Hondarribia eta Kemeneko dantzariek erakustaldiak emango dituzte han eta hemen, herriko kale eta plazetan.
Egilea
Asier Perez-Karkamo
Komunikabidea
Oarso-Bidasoako Hitza
Mota
Albistea
Data
2014/05/20
Lotura
Oarso-Bidasoako Hitza

Kemenekoez gain, larunbatean kanpotik etorritako dantzarien erakustaldiak ikusteko aukera izango da Hondarribia Dantzanen, dantza taldeko arduradun Eder Valladaresek azaldu bezala: “urtero saiatzen gara dantza mota desberdinak eskaintzen, euskal dantzen aberastasuna zabaldu asmoz. Aurten, Iruñeako Ortzadar folklore elkartea, Lizartzako eta Biasteriko dantzariak izango ditugu Hondarribian, hilaren 24an.”

Hondarribiko Udaleko Kultur zinegotzi Txomin Sagarzazuk nabarmendu du herrian errotutako ekitaldi sorta dela: “Hezkuntza ikuspegia zein alde ludikoa barneraturik dituen dantzaren eta orobat folklorearen inguruko festa bat da. Ondo errotutako ekitaldi bat da; euskal dantzarekin dugun harremanean sakontzen jarraitzeko eta esperientzia berriak bizitzeko esperientzia eskaintzen digu hondarribiarrei.”

Hondarribia Dantzanek bi helburu ditu, hezitzea eta dibertitzea, eta Kemenen urteroko programazioan leku garrantzitsua du. “Hondarribia dantzan, hezkuntza ikuspegia zein alde ludikoa barneratzen dituen dantzaren eta oro har folklorearen inguruko festa dugu. Kemen dantza taldearen helburu nagusienekin bat eginez, bailaran dantzaren zabalpena bultzatzeaz gain euskal kultura dantzatuaren alde lan egin ahal izateko bidea ere bada”, gehitu du Valladaresek.

Hondarribia Dantzan 2014. Egitaraua

Hilak 23, ostirala

  • 20:00. Hitzaldi-kontzertua Kultur Etxean, Ortzadar euskal folklore elkarteko musikariekin.

Hilak 24, larunbata

  • 17:30. Hondarribiko kaleetan zehar Biasteriko dantzariek, Otsolar Lizartzako dantzariek eta Iruñeko Ortzadar folklore elkarteko dantzariek emanaldiak eskainiko dituzte.
  • 18:30. Dantza agerketa Santa Maria Magdalena plazan, Biasteriko, Lizartzako eta Ortzadarreko dantzariekin.
  • 20:30. Santa Maria Magdalenan, Erromeria, Kemen dantza taldeko musikariekin.

Hilak 2, igandea

  • 11:00. Bailaran euskal dantzak ikasten diharduten Kemeneko Adaxkako dantzarien bilkura burutuko da. Santa Maria Magdalenatik abiatuz herriko kaleak alaitu ondoren, 12:00etan Arma plazan guztien artean dantza agerketa burutuko dute.
Adaxkako gaztetxoak igandean dantzatuko dira

Adaxkako gaztetxoak igandean dantzatuko dira

Dokumentuaren akzioak