Euskal dantzak «dinamizatu» nahian

Bai dantza klask' ikusgarria bihar estreinatuko dute Baigorrin, eta etzi Elizondon

Joan den udatik dantzaren plazera izerdiz estaltzeko aukera ukanik, emaitza bihar estreinatuko dute Baigorriko (Baxenabarre) Plaza Xokon, 21:00etan. Etzi Elizondon (Nafarroa) ariko dira, Lur aretoan, 18:30ean. Eta ekainaren 26an Luhusoko (Lapurdi) Harri Xurin, 17:00etan. Ikusgarria Baigorrin irekitzekoa duten ikastolaren lehen mailaren aldeko kanpainan integratua dute.

Abiapuntua, berez, euskal dantza tradizionala dute, dantzarien oinarria hori den heinean. «Arradinamizatu nahi izan dugu euskal dantza. Eta gero, handik hara joan gara beste dantza batzuengana, elkarri josi nahian denak», beti ere Alfaroren hitzetan. «Beste dantzak sartu nahi izan ditugu, desafio bat bezala. Hip hop dantzak, adibidez, edo garaikidea. Dantza hauek dastatzeko pixka bat», gehitu du Argia Olzomendik. Proiektua aitzinatu arau, dantzari musika gehitu zioten bezala, kantuak, bertsoak eta antzerkiak ere aurkitu dute beren lekua.

Eta aldi bakoitz kolaboratzaileekin lan egiteko gogoa izan dute, esperientzia beti eta urrunago eramateko gisan. Bakoitzean pertsona espezializatuekin. Dela kantuan Denise Olhagaraiekin, antzerkian Ainara Gurrutxaga eta Urko Redondorekin edota Zuberoako dantzetan Joana Larrandabururekin. Orotara 14 dantzari dira, bereziki neskak direnak. Baigorriarrak gehienak baina Zuberoatik eta Lapurditik ere badituzte hurbildu zaizkienak. Taula gainean, musikariak izanen dituzte lagun, zazpi bat izanen direnak. Estreinaren zain, hasteko, esperientzia «biziki aberasgarria» egin zaie. Taldea goxoa osatzeaz gain, «dantza maite duenarendako horrelako proiektu bat bikaina da, dantza beti eta urrunago eramateko aukera duzulako», Olzomendiren hitzetan.

Bai dantza klask ikusgarriaren entsegu bat. / GAIZKA IROZ