Dokumentuaren akzioak
Euskal dantza Sanfilippo Sindromearen aurka Madrilen, Korrontzi eta Euskal Etxeari esker
Azken asteotan jo eta su entsaiatzen ibili dira Madrilgo Euskal Etxeko Sustrai Dantza Taldeko kideak, igandeko emanaldia prestatzen. Ikuskizun oso berezia izango da, Korrontzimusika taldearekin batera, Stop Sanfilippo Fundazioaren alde.
Korrontzi bere azken diskoa aurkezten ari da, "Korrontzi dantzan" izenekoa, eta Madrilgo emanaldirako euskal etxeko dantzarien lankidetza izango du.
Ikerketa berriak
Ekitaldi berezi hau antolatzeko ideia Euskal Etxearen eta Naiara Garcia de Andoin bilbotarraren arteko bilera batean sortu zen. Naiararen hiru seme-alabek Sanfilippo Sindromea dute; alzheimerraren antzeko endekapenezko-gaisotasuna, nagusiki haurrei eragiten diena. "Naiarak azaldu zigun animaliekin eginiko ikerketa berriek emaitza onak izan dituztela eta lehenbailehen finantziazio gehiago eskuratu behar zela gaixotasunaren prozesu geldiezin horren aurka borroka egiteko", azaldu du Euskal Etxeko Monikak.
Bilera horren haritik, Euskal Etxeak eta Korrontzi taldeak bat egin dute Sanfilippo Sindromearen aurka kontzertu solidarioa antolatuz. Emanaldia igande honetan izango da, Madrilgo Arte Ederretako Zirkuluko Antzokian. Korrontzik "Korrontzi Dantzan" diskoa aurkeztuko du Sustraia dantza taldeko kideen laguntzarekin.
Irrikitan
"Dantza taldea oso pozik dago, ekitaldi berezia da guretzat; alde batetik, Korrontziko Agus gure laguna delako, eta, bestetik, Izaskun koreografa, dantza taldeko irakaslea izandakoa delako", agertu diote EuskalKultura.com-i dantza taldeko kideek. "Gainera, Arte Ederretako Zirkuluan dantzatzea aukera polita da Madrileko publikoaren aurrean gure taldea aurkezteko, eta ekitaldi benefikoa izanda, are bereziagoa. Ilusio handiarekin ari gara koreografiak prestatzen, eta eguna iristeko irrikitan gaude".
Emanaldia 19:00tan hasiko da eta bertan bildutakoak Stop Sanfilippo Fundazioarentzeko izango dira. Sarrerak 10 euro balio dute; erosteko, jo hona.
Dokumentuaren akzioak
