Europa osoko urratsak gurean

Ezpalak dantza jaialdia izango da asteburuan, eta bikote dantza askatuak izango dira gaia

Europako hamaika pauso bilduko dira asteburuan Iruñeko eta Eibarko kaleetan. Transilvaniako (Errumania) hungariarren eta ijitoen dantzak izango dira ikusgai, baita Calabriako (Italia) Vesubioko tarantella izeneko dantza ere, Auverniako (Frantzia) bourre-ak, Asturias eta Aragoiko jotak (Espainia), baita Euskal Herriko jota eta porruak ere. Aurrez aurre ariko dira dantzan Europa osoko dantzari bikoteak, beraz.

Larunbatean, 17:30ean hasiko dira ekitaldiak Iruñean. Kalejira izango da Alde Zaharreko kaleetan, eta 18:00etan Burgoen Plazan hasiko dira dantza ikuskizunak. Iruñeko Duguna dantza taldea, Aragoiko Xinglar taldea, Italiako Rareca Antica taldea, Galdakaoko Andra Mari taldea, Errumaniako Kikerics taldea, Asturiasko Vezos Astures taldea eta Frantziako La Bourre Gannatoise taldea ariko dira dantzan.

Egun beteko festa igandean

Larunbatean eguerdian hasiko da festa Eibarren, eta 12:30ean hasiko dira ikuskizunak, Untzaga Plazan. Eibarko Kezka taldea ariko da kasu honetan Iruñeko Duguna taldearen ordez, baina mantendu egingo dira gainontzeko ikuskizunak. 14:30ean, bazkaria izango da, eta erromeria azkenik, Arrabots izeneko taldearekin.

Dantza ikuskizunez gain, Eusko Ikaskuntzaren Folklore Sailak dantza askatuaren inguruko jardunaldi akademikoak ere antolatu ditu Eibarko Portalea Kultur Etxean. Larunbatean eta ekainaren 4an izango dira jardunaldi horiek.

EZPALAK DANTZA JAIALDIA

Zer. Europako hainbat dantza talderen ikuskizunak eta hitzaldi akademikoak.

Non. Iruñean larunbatean eta Eibarren igandean (Gipuzkoa).

Iruñeko Duguna dantza taldea da Ezpalak jaialdiaren antolatzailea (irudikoa), Eibarko Kezka taldearekin batera. / BERRIA