Euria dantzaren erritmo

Dantza, musika eta poesia euriaren erritmora moldatu ditu Villabonako Oinkari taldeak Ari du ikuskizunean. Euskal Herriko kantuak oinarri hartuta, dantza tradizionala eta garaikidea nahastu dituzte, eta Juan Kruz Igerabide idazleak irakurritako poesiak txertatu dituzte. Apirilaren 15ean Tolosan egin zuten emanaldia, eta han egindako lanarekin pozik gelditu zirenez, ikuskizuna DVD batean argitaratu dute, olerkiak eta dantzak biltzen dituen liburuxkarekin batera.

Edu Muruamendiaraz koreografoak moldatu ditu abestiak eta dantzak. Alazne Gurrutxaga Oinkariko kidearen esanetan, Muruamendiarazen lanari esker eman dute dantza garaikiderako pausoa: «Ez gaude oso ohituta arrakasta honetara, herri mailako dantza talde bat garelako. Proiektu hau egin dugun gauzarik garrantzitsuenetakoa da. Eduri esker, gure estiloan aldaketak egin ditugu, dantza garaikidera hurbilduz». Ikusleek animatuta argitaratu dute DVDa: «Egindako lanarekin gustura gelditu ginen, baina ikusleak izan ziren emanaldia argitaratzera animatu gintuztenak».

Euria da dantza eta poesia elkartzeko gai aproposena Gurrutxagarentzat: «Ikuskizuneko protagonista euria da, eta horrek erritmoarekin jokatzeko aukera eman digu. Euskal Herriko ingurunearen ezaugarri nagusietako bat da, eta musikarekin erritmo aldaketak lantzeko aitzakia eman digu».

Dantza ez ezik, poesia ere txertatu dute ikuskizunean: «Literaturako arloak aztertu ondoren, euriak markatutako erritmoa adierazteko egokiena poesia zela iruditu zitzaigun; izan ere, errezitaldiak berak erritmo ugari izan ditzake, eta joko horrek asko errazten du dantzaren eta irakurketaren arteko lotura». Poesia dantzaren erritmora moldatu du Igerabidek: «Oso garrantzitsua zen proiektu honetarako erritmoa markatzeko gai ziren testuak aukeratzea, dantzarekin batera jokatzeko». Bere testuak ez ezik, euskal idazleen poesiak ere erabili ditu.

Herriko dantza talde bat da, hala ere, zazpi urtean profesionalen pare egin dute lan bertako dantzari gazteek. Muruamendiarazen arabera, taldekideek menderatu dituzte koreografia garaikideak: «Gozatu egin dut lan hau egiten. Zazpi urtean aritu naiz Oinkari taldearekin, eta txikitan hartu nituen dantzariak koxkortzen ikusi ditut, profesionalen pareko mailara iritsiz».

Dantza tradizionalak eta garaikideak poesia eta musikarekin nahastu ditu Oinkari taldeak. / - / EZEZAGUNA