Etorkizuna Kontzeptua konpainia sortu da euskal dantzaren alde indarrak batzeko

Dantzariei, musikariei, koreografoei edo beste motako eragileei idekia den "laborategiak" euskal ondare inmaterial hunen birsorkuntza lagundu beharko luke. Euskal Kultur Erakundea ( EKE ) eta Miarritzeko Malandain balletarekin joan den ortziralean izenpetu duen hitzarmenari esker, Etorkizuna Kontzeptuak sostengu tekniko eta ekonomikoa segurtaturik ditu hiru urterendako, 2014a arte.

Gaur egun, konpainia gazteak Euskal herriko taldeetatik datozen berrogei bat dantzari eta musikari heldu biltzen ditu: Begiraleak, Biez Bat, Ezpela, Kukai gazte, Leinua, Primadera... Erregularki biltzen dira teknikaren lantzea eta koregrafia berrien ikaskuntza aldizkatzen dituzten tailerren bidez.

Etorkizuna Kontzeptuak konpainia iraunkor baten izaiteko xedea du, urtez urte dantzari eta musikaren mailaren hobetzeko. Talentuz beteriko talde bat sentsibilitate ezberdineko koreografo eta konpositoreen eskutan utziko da sorkuntzaren aniztasuna zilegitzeko.

Lehen emaitza hemendik zazpi hilabetetara
Bittor Corret, Christian Larralde eta Maider Oiartzabal euskal koreografoek landutako "Ravel Jauna" deitutako sorkuntza 2012 urrirako aurkeztea espero dute. Ez da dudarik beste ikusgarri batzuk gauzatuko dituztela ondoko hilabeteetan. Konpainiak "kudeantza artistiko" bakar baten eskutan ez izaitea erabaki du, hain zuzen, ahal bezain bat koreografoentzat atea idekirik uzteko. Musikari eta dantzariz osatutako administrazio kontseilu batek ditu erabaki artistikoak hartuko.

EKE eta Malandain balletarekin Etorkizuna Kontzeptuak izenpetu duen hiru urteko itunari esker, bi partaideek euskal kulturaren mailan duten jakintasunaren aprobetxatzeaz gain, balletak dantzaren arloan duen goi mailako tektnika aholkularitza onuragarri ukanen du.

Hiriburuko Leinua konpainiak 2011ko apirilan ukan zuen biltzar nagusian, Etorkizuna Kontzeptua sortzeko iniziatiba hartu zuen. Dituen egoitza, materiala eta esperientzia prestatu zion haren "umeari". Hortaz gain, Sakratua sorkuntzari esker Leinuak irabazten zituen etekin ekonomikoak ( 11 000 euro ) erabiltzen zituen proiektu berriaren lehen urratsak diruztatzeko. Aurtengo urte bukaeratik goiti, Hiriburuko herriko etxeak bulego bat eta dantza gela bat prestatuko die.

Heldu gazteen dantza praktikaren uztea arrazoi ezberdinengatik ( lana, ikasketak... ), talentuen dantzarien barreiatzea lurraldeko talde ugarietan, betiko jestu koreografikoen errepikatzeatik datorren nazka edo testuinguru ekonomiko zailak goi mailako euskal dantzaren garapena azkarki mugatzen dute eta ondorioz, oztopo guzi haiei aurre egiteko� du Leinuak iniziatiba hau abiarazi.

Konpainiaren bizia 2014a arte bermaturik da eta epe hunetan emandako sorkuntzen arabera, ikusiko da ebenturak segituko duen edo ez.

Joan den ortziralean izenpetu dute hitzarmena Hiriburun.