Estreinaldiari begira

Kukai Dantza Konpainiak bere azken lana estreinatuko du datorren astean: 'Hnuy illa...' Joseba Sarrionandiaren poesian oinarrituta; egun hauetan, azken entseguak egiten ari dira Kulturgunean, eta esperientziaren berri eman dute

Argiztatzaileak, jantzi arduradunak, musikariak... Joan-etorriak etengabeak dira aretoan. Oholtzan Mireia Gabilondo zuzendaria eta Kukai Dantza Konpainiako zazpi dantzariak eszena bat errepasatzen ari dira. Estreinaldirako egun gutxi falta arren, giro lasaiean topatu ditugu. Izan ere, lantalde honek dagoeneko esperientzia mordoa pilatu du azken urteetan. Horrela aitortu digu Jon Mayak, ikuskizuneko koreografoak eta Kukaiko zuzendariak: «Nabari da egun gutxi falta direla estreinaldirako, lana pilatzen doa eta gorputza ere ezberdin sentitzen hasten da. Dena den, badakigu zeren bila goazen, aurreko hilabeteetan ere lan dezente egin dugu eta gure lana erakusteko gogo handiz gaude dagoeneko».

Aurreko ikuskizunetako protagonista berak

Kukai eta Tanttakaren aurreko ikuskizunetan bezalaxe, herriko zazpi dantzari izango dira Hnuy illa... ikuskizuneko protagonistak. Jon eta Alain Maya, Eneko Gil, Urko Mitxelena, Ibon Huarte, Nerea Vesga eta Vanesa Castaño.

Gerrako umeak, Jorge Oteiza eta bihotz taupadak izan dira beraien aurreko ikuskizunen oinarri. Oraingo honetan, berriz, Joseba Sarrionandiaren poesia hartu dute inspirazio iturri gisa. «Aurkezpenak-eta egiten ditugunean xehetasun gehiago emango ditugu, baina aurreratu dezakeguna da ikuskizun oso poetikoa dela; poesia eder batek zipriztinduta datorrela».

Kolaborazio garrantzitsuak

Joseba Sarrionandiaren poesiaz gain, Kukai eta Tanttakak kolaborazio garrantzitsuak bildu dituzten beren proiektuan. Gabilondoren gidoiari eta Mayaren koreografiari Iñaki Salvadorrek jarri dio musika, eta, besteak beste, Asier Hernandez aktoreak eta Mikel Laboa, Ruper Ordorika eta Maria Berasarte musikariek kolaborazioak egin dituzte.

Aurki izango dugu Kukai Dantza Konpainiaren ikuskizunaren berri gehiago. Oraingoz lehenengo hitzordua: Maiatzaren 11an, 20:00etan, Errenteria Hiria Kulturgunean.