Erromerian, Errenterian

Dantza, musika eta jatekoa izango dira etzi Errenterian (Gipuzkoa), Erromeria Egunean. Aurtengo jaialdia hamabigarrena izango da, Madalen jaien atarian.

Diana batekin hasiko da festa, 10:00etan. Eguerdian, berriz, emanaldi garrantzitsuenetako batez gozatzeko aukera izango da: neskatxen sokadantza. Dantza tradizionalak ez ezik, gaur egunera egokitutako dantzak ere erakutsiko dituzte.

Ondoren, 14:30ean, herri bazkaria izango da, Galtzarabordako kiroldegian. Txartelen prezioa 15 eurokoa da; gaztetxoentzat, berriz, 10 eurokoa. Txirri, Mirri eta Txiribiton Junior pailazoek emanaldia emango dute 17:30ean, Xabier Olaskoaga plazan.

Orduerdi geroago, erromeria nagusia izango da toki berean, baita Zumardian eta Leku Zarran ere. Eguna bukatzeko, larrain-dantza egingo dute, aurtengo Erromeria Eguna agurtzeko. Trikitilarien, txarangaren, dultzaineroen eta txistularien doinuek girotuko dituzte Errenteriako kaleak.