Goizeko bostetan emango diote hasiera domekari, errebonbilloek udaletxe aurrean jaurtiko dituzten munizioekin. Horren ondoren, herriko kaleetan zehar ibiliko dira tiroka, eta gero alkateak gosarira gonbidatuko ditu.
11:00etan Nesken Gomazko Paleten zirkuituko partidua egongo da, 11:30ean meza, eta 13:00etan Durangaldeko Jaizale Txistularien kontzertua. Arratsaldean, 17:00etan, Elorrioko Errebonbilloek Errosarioko Amabirjinari prozesioan lagunduko diote, eta herritarrekin batera soka-dantza dantzatuko dute.
Aurten, gainera, Elorrioko Argazki Taldeak errebonbilloen gaineko erakusketa egingo du Iturri Kultur Etxean. Erakusketa urriaren 13ra arte egongo da bisitagai.
