Edukira salto egin | Salto egin nabigazioara

Tresna pertsonalak
Hemen zaude: Hasiera Hemeroteka Eraikitako zubiak sendotuz

Dokumentuaren akzioak

Eraikitako zubiak sendotuz

Baionako Maimorables jaialdiak antzokitik auzoetara aterako ditu musika eta dantza, hamargarren aldiz

Egilea
Nora Arbelbide
Komunikabidea
Berria
Tokia
Baiona
Mota
Albistea
Data
2010/04/02

Hamar urte daramatza «auzoen arteko bereizketak hautsi» nahian. Aurten, hasteko, partikularki lortu dute tokiko elkarteekin partaidetzak muntatzea. Hamar bat orotara, usaiako instituzioez gain. Eta elkarlan hori sendotzeko xedez, «herri ekimenak ikusgarriekin nahastea» erabaki dute, antzokiko zuzendari Dominique Burukoaren hitzetan. Horren adibide da gaur jaialdia zabalduko duen lehen saioa. Izan ere, egun osoan Baionako Saint-Etienne auzoan ganerreko trasteen azoka antolatuko du bertako MVC herritarren etxeak, eta horri Creature konpainiaren C'est la lune qui me l'a dit txotxongilo ikusgarria gehituko diote, goizez eta arratsaldez.

Kontzertuen artean, maiatzaren 7an, Bokaleko antzokian (Lapurdi), Jeanne Cherhal frantses kantaria ariko da, eta lehen partean Just Married tokiko taldea, duela pare bat urte jaialdiak antolatzen duen musika lehiaketa irabazi zuena. Jaialdia bururatzeko, berriz, Tete kantaria ariko da. Lehen zatian, Old School Funky Family izanen du horrek. Talde hori ere jaialdiaren lehiaketa irabazi izanagatik ariko da. Maiatzaren 30ean ariko dira Baiona Iparraldeko Sainte-Croix auzoan. Azpimarragarria izan daiteke, ez baita usu gertatzen antzokiaren partetik, urririk izanen dela kontzertua.

Funtsean, jaialdiak eskaintzen dituen beste saio anitz ere hala izanen dira. Beti musika arloan, baina arrunt beste estilo batean eskainiko du gaualdia Baiona eta Lapurdi itsasaldeko orkestrak, Ravel, Milhaud eta Bizet konpositoreekin; antzokian izanen da, maiatzaren 21ean, eta sarrera ordainduz.

Dantzari dagokionez, zuzendariak deskribatu bezala, «hiriko kulturatik jalgi dantza» izanen da jaialdiko protagonista. «Hiritarra», erran nahi baita. Hip hop eta Afrikako dantzak nahasten dituen Georges Momboye konpainia, adibidez. Hilaren 9an ariko da Saint-Croix auzoan, eta egun berean ikastaldiak emanen dituen. Beste konpainia bat Kafig izanen da. Brasilgo dantzaz busti Agwa & Correria ikuskizuna ekarriko du maiatzaren 23an.

Jaialdiko beste ikusgarrien artean, izango da bestelako ekimenik ere: musika lehiaketen finala eta Audrey Hocek Baiona iparraldeko auzoaz egin sei film laburren emanaldia.

Dokumentuaren akzioak