'Elkar+ekin dantzan!': dantzatzera deitu dute boluntariotza aldarrikatzeko

'Elkar+ekin dantzan!' ekimenaren antolatzaileek martxoaren 20an antolatu den ekintzara deitu dute. Hain zuzen ere, elkarteen eta boluntarioen lana aldarrikatzeko Euskal Herriko hainbat herritan dantzatuko da.

Elkarrekin Garak, Korrika eta AEKrekin batera, ekitaldi honetan dantzatuko den abestia aurkeztu du: 'Martxa baten lehen notak'. Abestia Mikel Laboaren kanta baten bertsio bat da eta Olatz Salvador eta Bihotx taldeari eskatu zieten abesti berri bat ekoizteko lana, dantza egitea ahalbidetzen duen bat. Bideoklipa ere sortu dute.

Ekimenaren sustatzaileek originalaren helburua nabarmendu dute: "Gizakien eta herrien arteko elkartasunaren ideiaren aldeko martxa da, herri eta gizaki bakoitzari dagokion begiramena eta ezagutzatik abiatuz", aipatu zuten Laboaren lanaren inguruan. Jatorrian 'Martxa baterako oharrak' izendatu zen. Haien aburuz, aldarrikatu nahi dituzten "helburuekin bete-betean jotzen duen abestia" aurkitu zuten.