Elgoibarko tradizioan errotzeko asmoz birsortu dute ezpatadantza

  Haritz Euskal Dantzari Taldeak dantzan.com blog komunitatean azaldu duen moduan, hamaika esfortzu eta buruhausteren ostean lortu dute sasoi batean urriko lehen domekan Errosarioko Ama Birjinaren omenez egiten zen ezpatadantza birsortzea. Eguraldiak gehiegi lagundu ez zuen arren, Haritzeko dantzariek jendaurrean aurkeztu zuten dantza saio ikusgarria joan zen domekan, Udal Txistulari Taldearen laguntzaz. Eta, garrantzitsuagoa dena: "oinarri historiko sendoen gainean eraikita dagoen dantza” Elgoibarko tradizioaren zati bihurtu nahi dute aurrerantzean.

  Gipuzkoako herri gehienetan bezala, duela zenbait mende ezpatadantza egiten zen Elgoibarren ere. Hori horrela dela frogatzen duten zenbait datu daude. Aurkitutako aipamen zaharrenak 1599. urtekoak dira, Korpus Egunean dantzari, danbolin eta arkabuzeroen partehartzea aipatzen baita. Aurrerago, Errosarioko Amaren Kofradiaren sorrerarekin, urriko lehen asteetan egin zen ezpatadantza Errosario kalean.
  Duen izaera zeremoniatsuari begiratuta, ez da harritzekoa historian zehar dantza hau jai edo ospakizun garrantzitsuekin lotuta azaltzea. Agintari nagusien bisita edo beste nolabaiteko ekitaldi garrantzitsuren bat bada, presente dago ezpatadantza Elgoibarren.

•Omenaldia Arrieta, Lizarralde eta Urbeltzi
Datu guzti horien bilketa eta azterketa lanean ordu mordoa pasatakoak dira Koldo Lizarralde eta Pello Arrieta. Beraiek izan ziren, gainera, ezpatadantza berreskuratzera Haritzekoak animatu zituztenak. “Beraiei esker dugu eskuartean aipatutako informazioa”.  Gauzak horrela, domekan egin zuten saioan bi historialariak eta ezpatadantzaren birsortzean koreografiaren egilea izan den  Juan Antonio Urbeltz, dantza maisu eta folklorista, omendu zituzten. “Plazerra izan da guretzat maila horretako antropologo eta folklore ikerle batengandik ikasi ahal izatea. Mila esker beraz, berari ere”.