'El calendario del año' saioaren bigarren denboraldia hasiko da gaur

Taldeka egutegi bat osatzea helburu duen ETB2ko saioa Laila Mohamedek aurkeztuko du berriz

Estreinako denboraldiarekin alderatuta, berritasun bat du bigarren urteak: argazki saioak kalean egingo dituzte. Horrela, Bilboko Kale Nagusian, Donostiako Kontxa hondartzan edo Gasteizko Andre Mari Zuriaren plaza izango dira argazki saioen kokalekuak, Euskal Herriko beste hainbat lekuetaz gain. Kaleko jendea lekuko izatea nahi dute saioaren arduradunek.

Gaurko saioan agertuko diren taldeak Euskal Herriko neurri handiko modeloak eta Goierri-Erandio sokatirako munduko txapeldunak dira. Besteak beste, honako talde hauek ere agertuko dira saioan: Realeko emakumezkoen lehen taldea, suhiltzaile talde bat, pilotari talde bat eta gizonezkoez eta emakumezkoez osatutako euskal dantza talde bat.

Publikoak aukeratuko du

Talde bakoitzak seina argazki izango dituen saioa egingo dute. Puntu gehien lortzen dituzten bi taldeak pasatuko dira finalera. Beste saio bat egingo dute finalean, sei argazki gehiagorekin, urteko hilabete bakoitzeko argazki bana. Ikusleek aukeratuko dute saioaren irabazlea.

Argazkilariak Lucho Rengifo eta Patricia Moreno izango dira. Epaimahaikideak, berriz, Gabriel Azkoitia estilista, Richard Lajusticia argazkilaria, Santi Hernandez publizista eta Maria Ruiz ile apaintzailea eta lehiakide ohia izango dira.

Iazko irabazleak Castejongo udaltzainak izan ziren. Gainera, saioa atzerrira saldu dute.