Ekoizpen propioaren aldeko apustuari eutsiko dio Arriagak

Hiru antzezlanen, dantza ikuskizun baten eta hiru operaren sorreran parte hartuko du antzokiak hurrengo denboraldian

Guztira zortzi dira 2010eko abuztutik 2011ko uztaila bitartean Arriagak estreinatuko dituen ekoizpen propioko lanak: hiru antzezlan -Fin de partida, Beaumarchais (Teatro Español antzokiarekin elkarlanean) eta La avería (Blanca Portillo aktore espainiarrak zuzenduko du)-, dantza ikuskizun bat -Aukeran taldearekin ekoitzitako Burnia-, hiru opera -L'incoronazione di Popea, Il segreto de Susanna eta La voix humane- eta zartzuela bat -El caserío-.

Chicago antzezlan musikalak zabalduko du Arriaga antzokiaren 2010-11ko denboraldia. Antzerkia, dantza, musika, opera eta zartzuelako 72 ikuskizunek osatuko dute egitaraua. Berrikuntzetako bat opera eta zinemari eskainitako zikloa izango da, hurrengo urteko apirilean.