Ekintzaz betetako egitaraua prestatu da larunbatean Euskal Jaia ospatzeko asmoz

Dultzainero, trikitilari eta txistulariek egindako kalejira bat martxan jarriko ditu ekitaldiak. Hauen atzetik jende asko ibiliko da leku batetik bestera Deba zeharkatzen. Goizean zehar ere piztuko da giroa Plaza Zaharrean. Bertan, baserriko produktuen erakusketa eta salmentarako postuak ipiniko dira, eta taloak eta sagardoa dastatzeko aukera izango dute hara joaten direnek.

Deba Musikaleko dantzariek euren trebetasuna erakutsiko dute eguneko bigarren kalejiran. Ordu bat inguru ibiliko dira kalez kale, eta Foruen Plazara iristen direnean Gure Kai Taldearekin bilduko dira. Han ikuskizun polita aurrera eramango dute biztanle guztiei zuzenduta. Hau bukatu eta gero festak Aitor Tabernan jarraituko du, non dantza poteoa hasiko baita. Horretarako, Gure Kai Taldeko kideek ez dute atsedenik hartuko eta euren erritmoa mantenduko dute. Jan aurretik, larraindantza ikusteko aukera Alamedako Kioskoan.

Bazkal orduan denek Foruen Plazara itzuli beharko dute, eta bakoitzak ekarritako janariarekin hasiera emango zaio Kantu Bazkariari. Patxi eta konpainia taldea arduratuko da ekitaldia alaitzen.

Haurren txanda arratsaldean izango da. Lehenbizi, ondo pasatzeko aukera izango dute Kioskoan jarritako puzgarriekin. Geroago, erraldoi eta buruhandiekin jolasteko garaia izango dute txikiek. Azkenik, Musika Bandak bere instrumentuak kalera eramango ditu, baina honekin ez da egunari amaitutzak joko, zeren eta gauean erromeria egongo baita Foruen Plazan Gaubela taldeak alaiturik.