Kulturaren Euskal Behatokiak Kulturklik plataforman urtarriletik ekainera bitartean izan ziren ekitaldiekin egindako ikerketaren arabera, denera 11.306 kultur emanaldi izan dira aurtengo lehen seihilekoan Gipuzkoan, Araban eta Bizkaian. Batez beste, hirurogei ekitaldi izan dira egunean, 2024ko aldi berean baino %7,45 gehiago. Horietako %38 euskaraz izan dira.
Datuei lurraldeka erreparatuz, kultur jardueren %45,5 Bizkaian egin dira, %38,9 Gipuzkoan eta %15,6 Araban. Ekitaldi motari dagokionez, berriz, emanaldien %25 kontzertuak izan dira, hau da, 2.831 emanaldi, iaz baino %3,4 gehiago. Horietatik, %40 doakoak izan ziren. Antzerki emanaldiak %19,6 izan dira, hau da, 2.217 emanaldi, iaz baino %2,6 gehiago.
Horien ostean daude erakusketak (%6,4), bertso saioak (%4,7) eta dantza emanaldiak (%4,3). Erakusketak aurreko urtean baino ia %2 gehiago izan dira, eta, generoari dagokionez, gehienak arte garaikidekoak. Bertsolaritzari erreparatuz, gehienak doakoak izan dira. Dantza emanaldien artean, berriz, %59 izan dira urririk. Dantza garaikideko emanaldiak izan dira jendetsuenak.
