Edalontzi artean dantzatzen

Dantza 'Correria' eta 'Agwa'

Correria izeneko piezan argi geratu zaizkigu Companhia Urbanaren jatorri kaletarra eta akrobaziarako gaitasuna: espero zen bezala, ikusgarriak izan dira airetiko itzulipurdiak, buru gaineko bira izugarriak eta energia erakustaldiak. Baina haiekin batera oso interesgarriak izan dira beste elementu batzuk, hala nola erritmoak gorputzarekin behegainean markatzeko joera, bikoteka egindako eskultura erdi estatiko erdi dinamikoak eta, beste ezeren gainetik, mugimendu-abiadura desberdinak konbinatzeko era. Bidaia horretan soinu-banda aberatsak gidatu ditu ikusleen emozioak, eta magrebtar kutsuko doinuek inguratu gaituztenean heldu da proposamena bere tontorrera. Hortik aurrera erabili dituzten oin artifizialekin, ordea, efektu politak sortu dira, baina azken zati horiek collage sentsazioa areagotu dute eta galbidean jarri da ordura arteko lana.

Gaualdiko bigarren atalean -Agwa- Rio de Janeiroko faveletako praka laburrak jantzi dituzte dantzariek, baina ur edalontziak izan dira protagonistak, haiekin dorre ezegonkorrak, lerro paralelo perfektuak, suge malgu luze-luzeak eta ur zorrotada jostagarriak egin dituztelako, batucada estiloko erritmopean eta itzelezko indarra eta koordinazioa erakutsiz edalontzi artean dantzatzean.

Bigarren koreografia honetan ugariak izan dira txantxa eszenikoak, eta dantzarien ukabila zarratuek eta gorputz enbor biluziek ezin hobeto adierazi dute indar maskulinoaren edertasuna. Gainera, koreografiaren diseinua bestea baino askoz trinkoagoa izan da eta ikusleok pare bat aldiz eten dugu emanaldia gure txalo zaparradekin. Agurren unea ere gogoratzeko modukoa izan da, dantzariek behin eta berriro oparitu dizkigutelako beren akrobaziak, beren irribarre gazteak eta, zelan ez, dantza egiteak ematen dien bizipoza.

Taldea: Kafig eta Companhia Urbana de Dança. Koreografiak: Mourad Merzouki eta Diego Gonçalves Leao 'White'. Lekua: Bilboko Euskalduna jauregia. Eguna: Otsailaren 20a.