dFeria murriztuaren balantze ona egin dute

Donostiako Arte Eszenikoen Feriak 3.800 ikusle izan ditu aretoetako saioetan, iaz baino %40 gehiago

Aretoak bete egin ziren Golden Apple Quartet-en Goibel , Fingersix-en La sonrisa ganadora eta Organik-en Maniatic@s ikuskizunetarako, Tanttakaren La mujer justa eta Ballet Biarritzen Magifique-k ikusleentzako tokiaren %65 betetzea lortu zuten, eta Kapzuloa proposamen berritzaileak 144 ikusle bildu zituen 12 emanalditan. Horrez gain, Gipuzkoako Dantza Profesionalen Elkartearekin batera, Gustavo Zajac-ek tailer bat eskaini du, eta koreografia bat sortu.

Antolatzaileentzat, dFeria azokak dantza eta antzerkia «ahalegin beraz zaintzen» dituela erakutsi du. «Maila artistikoa, antolakuntza, aurrekontuaren gauzatze zorrotza eta Euskadiko arte eszenikoen sektoreak agertutako konpromisoa azpimarragarriak» izan direla gaineratu dute.

Guztira 4.060 lagunek parte hartu dute. Horietako 3.804 aretoetako ikuskizunetan bildu dira - kopurua iaz baino %40 handiagoa izan da- eta gainerako 256 jarduera osagarrietan.

dFeria, «erakusleiho ona»

Aurten, 172 profesional bildu dira dFerian, programatzaile, banatzaile, ekoizle eta kazetariak kontuan hartuz. Beraz, aurreikuspenen %85 bete dituzte antolatzaileek. Horien arabera, dFeriak aurkeztutako proposamenek antzokietako arduradunen interesa piztu dute. Balantzean, «aurtengo azokak ekarri dituen salerosketen aurreikuspenak baikorrak» direla ziurtatu dute.

Hamabost ikuskizun aurkeztu dira, eta horietako batzuk erabateko estreinaldiak edo Euskal Herriko estreinaldiak izan dira. Antolatzaileen esanetan, «horrek erakusten du konpainiek dFeriaren aldeko apustua egiten dutela, erakusleiho egokiena delakoan».

Zenbait batzarretan antzerkiaren egoeraz gogoeta egin da, eta Itiner Arte-k ere hurrengo azokaren helburuak finkatu ditu.