Hemen zaude: Hasiera Hemeroteka Dantzari txikien festa handia

Dokumentuaren akzioak

Dantzari txikien festa handia

Egilea
Amaia Goikoetxea
Komunikabidea
Diario Vasco
Tokia
Alegia
Mota
Albistea
Data
2007/11/11

Atzo goizean Alegiara hurbildu zena berehala konturatuko zen, eguraldi bikainaz gain, bazela zerbait han; noski, Dantzari Txiki Eguna ospatu baitzen atzo Alegian. Azaro Kulturaleko egitarauaren barnean antolatu zuen eguna Alegiako Dantza Taldeak.

Iaz ere ospatu zen egun hau, baina orduko hartan, arratsaldean ospatu zuten dantzariek euren festa. Atzokoan goizean goiz jeiki ziren dantzariak egunari ekiteko. Alegiako dantzariez gain honako herri hauetakoek ere parte hartu zuten Dantzari Txiki Egunean: Altzo, Ikaztegieta, Ibarra, Tolosa, Anoeta, Irura, Villabona eta, eskualdeko hauez gain, baita Usurbil ere. Guztira 225 haur eta gazte inguru, eta hauei monitore, antolatzaile eta gainerakoen beste sortatxo bat gehitzen badiegu, 250 bat lagun herrian kalejiran. Ez dira gutxi.

Goizeko 10:00etan egina zuten guztiek hitzordua eskolako jolastokian. Jendeari begietako makarrak kentzeko denbora pixka bat eman, guztiak bertan zirela kontatu, «denak al gaude?», «bai!», «goazen, bada!». Eta horrelaxe abiatu ziren 10:30 inguruan Larraitz auzora.

Bertako bi auzoetan burutu zuten kalejiraren lehenengo fasea, eta batean zein bestean, dantza ezberdinak eskaini zizkien balkoi eta leihoetatik zein kaletik bertatik begira zituztenei.

Larraitz auzotarrak gustura utzi eta hauen txalo zaparradak jaso ondoren, berriz ere eskolako jolastokira jo zuten dantzariek, hamaiketakoa egitera. Txorizo eta txokolate bokadilo ederrak jan zituzten. Behin indarrak berrituta, kalejiraren bigarren faseari ekin zioten, San Juan kalerantz abiatuz. Eta 12:30ean, herriko plazan, emanaldi nagusia eskaini zuten.

Gaur azoka berezia

Gaur jarraituko du Azaro Kulturak. Goizeko 10:00etan herritarren era guztietako produktuekin azoka berezia ospatuko da. Jakina da mihi urdinaren gaitza dela-eta, ardi, behi eta ahuntzik ezin dela eraman azoketara, baina ikusteko makina bat gauza interesgarri egongo dela esateko moduan gara.

Dokumentuaren akzioak