Eguerdi artean, tronboi jotzaileei dantzari txikiek hartu diete lekukoa Sanjuandegin. Juan Antxieta musika eskolako hiru musikarik lagunduta, Luis Alberdi Beltzaren dantza eskolako ikasleek emanaldia eskaini dute. Bero egiten zuen, baina, hala ere, gogotsu taularatu dituzte ikasturten zehar ikasitakoak, eta dozenaka lagun egon dira haien saio ikusten.
Arratsaldean, 18:30ean hasita, herri kirolak izango dira; gero, 19:45ean, jaietan saldu dituzten boletoen zozketa egingo dute antolatzaileek; eta 20:00etan, festen bukaerako ekitaldia izango da. Ostiralean plazara jaitsi zuten Mantangorriri agur esango diote herritarrek.
