Dokumentuaren akzioak
Dantzari ttipien biltoki izanen da Donibane Lohizune
![Urtean ikasitakoak erakusteko parada emanen die egunak dantzari ttipiei. (Artxiboko irudia) © Isabelle Miquelestorena.](https://www.kazeta.eus/media/asset_publics/resources/000/174/596/article_main_landscape/guz_dantzari_ttiki_2015_bayonne_mutxiko_isabelle_miquelestorena17.jpg)
Dantzaz eta kolorez beteko dute Donibane Lohizune Ipar Euskal Herriko dantzari ttipiek. Egun osoko egitaraua antolatu du Iparraldeko Dantzarien Biltzarrak maiatzaren 8an iraganen den Dantzari Ttiki egunerako. Hori izanen da urte osoan ikasi dituzten dantzak erakusteko unea.
Antolatzaileek iragarri dutenez, dantza taldeen «asteroko lan garrantzitsuaren eta Iparraldeko Dantzarien Biltzarrak egindako hilabeteetako lanaren ondorioz, aurten, 38 dantza talde izango dira bertan eta, horiekin, 1.400 haur». Musika eskoletako 50 ikaslek ere parte hartuko dute, ikusgarriari soinua ezarriz.
Dantzaldia denentzat
Ekitaldia goizeko 10:00etan hasiko da, taldeek herrian zehar eginen duten desfilearekin. Ondotik, egunaren kokapen nagusi izanen den pilota plazan haurren dantzak izanen dira ikusgai, 11:00ak aldean. Goiz eta arratsaldez zabalik egonen dira ostatu eta talo postua, jatekoa eta edatekoa eskaintzeko.
14:00etan abiatuko da arratsaldeko egitaraua. Begiraleak dantza taldearen eta Masterklaz Xiberoren dantza ikusgarriak izanen dira, eta oren bat berantago, Jose Cazaubonen eta Kiki Bordatxoren eskutik dantzaldia izanen da. Bertan, nahi duen orok parte hartu ahalko du, haur zein heldu.
Sartzeak sarean erosten ahal dira HelloAsso plataformaren bidez, edo egunean bertan pilota plazako sartzean. Gazte zein helduentzat, 6 euroan dira eta 12 urtetik behetiko haurrentzat urririk.
Egunaren antolaketarako, Donibane Lohitzuneko herriko etxearen eta bertako Begiraleak dantza taldearen laguntza izan du Iparraldeko Dantzarien Biltzarrak. Antolatzaileek bertara joateko gomita luzatu diote pertsona orori, haiekin batera «egun polit bat pasatzera».
Dokumentuaren akzioak