Dantzari gazteen trukea bermatzeko asmotan

Maiatzaren 7an hasi eta aste batez, Udaberriko T.Danz izeneko ekimenaren barruan, Bartzelona IT Dansako eta Pragako Balet Praha Juniorreko dantzari gazteek Donostian eta Donibane Garazin egonaldi bat eginen dute, Donostiako Dantzaz konpainiarekin batera, Baxenabarreko Herri Antzokiaren eta Dantzaz konpainiaren partaidetzari esker eta Akitania- Euskadi diru funtsen laguntzarekin.

Bigarren urtea da ekimena antolatzen dutela. Iaz bezala, aurten ere bi partetan banatu dute: bata udaberrian eta bestea larrazkenean. Larrazkenetako egitarauak publikoari begira pentsatzen dituzte batez ere. Udaberrikoetan, haatik, dantzarien arteko trukea da hobetsia. Izan ere, dantzari gazte profesionalek osatu konpainiek aste bat iraunen duen ikastaldi bat abiatuko dute 7an bertan, eta 15ean bururatuko dute. Inma Rubio etorriko zaie teknika eta dantza mota berrien irakastera, Valentziatik. Helburua «koadro klasikotik atera eta eskatzen diegun guztira laster batean egokitzen has daitezen da», Dantzaz konpainiako arduradun Filgi Claveriek azaldu duenez. Gainera, hiru konpainiak elkartuz, hiruren artean trukeak sortzea espero dute.

Lan horren emaitzen berri emanen dute halere, baina ez da hori helburu lehena. Maiatzaren 14an Donostiako Artelekun 14:00etan errepika publikoa izanen dute dantzariek. Eta biharamunean, berriz ere Donostian, baina aldi honetan performantzia bururatua ekarriko dute San Martin merkatura, 12:00etan. Donostiako emanaldi horiez gain, Lapurdiko Azkaine eta menturaz Beskoitze ere izanen dituzte bilgune. Beskoitzekoa ez da oraindik baieztatua, eta, gainera, ez da publiko izanen.

Baxenabarren ere arituko dira. Maiatzaren 7an, hain zuzen, lehen hitzordu gisa, Donibane Garaziko Le Vauban aretoan Bartzelonako IT Dansa ariko da, arratsaldean lekuko ikasleentzat eta 21:00etan guztientzat. Biharamun gauen tenore eta leku berean Pragako balletak du errepika publiko bat eskainiko. Egun berean Bartzelonako IT Dansa Donostiako Gazteszenan ariko da, eta 9an, betiere Gazteszenan, Pragakoaren aldi. Biak, 19:00etan.

Maiatzaren 13an Azkaineko Elkarteen Etxean Dantzaz konpainiaren errepika publikoa da izanen, 17:00etan.