Dantzari gazteek profesional mundura jauzi egiteko bultzada

Maiatzaren 13tik 23ra Gazte Baleten T.danz topaketetan Quebec, Paris eta Donostiako dantzariak bilduko dira

Maiatzaren 13tik 23ra, Quebec-eko Ballet Divertimento, Parisko Junior Ballet Classique CNSMD eta Donostiako Dantzaz elkarteko dantzariak lankidetzan arituko dira. «Beste herri batzuetako lan egiteko moduak ikasi eta hemengoak irakasteko aukera da», azaldu du Haritz Solupek, Gipuzkoako Foru Aldundiko Kultura Sustapeneko eta Hedapeneko zuzendariak.

Urtzi Aranburu, Jiri Kylian koreografoaren dantzari bakarlari ohia eta Nederlands Dans Theater konpainiako entsegu arduraduna, eta Philippe Cohen, Genevako Operako Baleteko Zuzendaria eta Lyongo Goi Mailako Dantza Kontserbatorio Nazionaleko zuzendari ohia, arituko dira irakasle lanetan.

Dantzari profesionalak sortuz

T.danz ekimenaren t hizkiak hiru esanahi dituela argitu du Filgi Claveriek, Dantzaz elkarteko zuzendariak: «Batetik, trantsizioaren t-a da, gazte konpainietan dauden dantzariak ikasle izatetik profesional izatera pasatuko baitira». Transmisioa ere esan nahi du hizki horrek Claverieren hitzetan: «Bestetik, topaketetan, goi mailako irakasleek ikasleei ezagutzak, teknikak eta errepresentazioak transmititzea da helburua». Dantzari gazteen arteko lankidetzan ere transmisioa sortuko dela uste dute proiektuaren antolatzaileek. «Azken t-a erdarazko transfronterizo hitzetik dator; hau da, proiektua mugaz gaindikoa dela esan nahi du», azaldu du Claveriek. Nazioartera begira egindako topaketak direla argitu du, eta kanpoko konpainiak bertaratzea ahalbidetzen duela horrek.

«Europan ez dago beste gazte konpainien topaketarik, eta hortik dator proiektu honen garrantzia», adierazi du Claveriek. Gainera, gazteentzat elkarlanean aritzea, lana partekatzea eta eguneroko kezkak partekatzea oso garrantzitsua dela nabarmendu du. T.danz topaketak antolatzen dituzten bigarren aldia da, eta proiektua «emeki-emeki handitzen» ari dela dio.

Ekimen honen bidez, dantza eta koreografia sorkuntzaren alorrean ikusleen sentiberatasuna lortzea espero dute antolatzaileek. Era berean, dantzari gazteak profesionalizatzea eta nazioartean kultur ekitaldiak ahalbidetzea dira T.danzen helburuak.

Topaketen harira, Donostiako Dantzaz konpainiak, Donibane Garaziko Garazikus dantza konpainiak eta Donostia Kulturak dantza emanaldiak antolatu dituzte. Aiziritzeko (Nafarroa Beherea), Donostiako, Mauleko eta Hazparneko (Lapurdi) agertokietan ikusi ahal izango dira Ballet Divertimento eta Junior Ballet Classique gazte konpainien emanaldiak.