Dokumentuaren akzioak
Dantzari eibartarrak Iruñean arituko dira bihar
Juan Antonio Urbeltz-ek zuzendutako 'Besta Berri' ikuskizuna Iruñara ailegatuko da bihar 20:00etan. Baluarte antzokiak hartuko du dantzaldia eta bertan ere dantzari eibartarrak arituko dira. Guztira Kezka Dantza Taldeko 18 kide izango dira 100 pertsona baino gehiago mugitzen duen ikuskizunean parte hartzeko.
Beste hainbat antzokitan eskaini da 'Besta Berri' ikuskizuna, Duguna, Argia, Maritzuli, Haritz, Urki, Arkaitz, Xinkako, Gure-Kai eta Kezka dantza taldeko partaideekin. «Operak, orkestrak eta sona handiko ekitaldiak ageri dira Baluarteko programan, eta Eibarko dantzariok pozik egingo ditugu bertan gure dantzak, Arrateko ezpata-dantza tarteko, beste batzuetan gure herriko auzoetan, Santa Kurutzen edo Goimendin, adibidez, dantzatzen dugun ilusio berarekin» diote Eibarko Klub Deportiboko dantza taldetik.
Edukiera handiko aretoa da Baluarte baina 800 sarrera baino gehiago saldu dira. Beraz, harrera ona emango dio Nafarroak 'Besta Berri' ikuskizunari. Sarrerak 14 eta 18 eurotan daude salgai.
Dokumentuaren akzioak
