Gorputza mugitu nahi izan eta "festarako gogoz dena etor dadila" 13. Dantza Egunera, hortxe Orbeldi dantza taldetik egin diguten gonbita. Izan ere, dantzari eta zaletuena izango da herri hau larunbat honetan, apirilaren 5ean. Ekitaldiak ikusi eta entzun soilik ez, jai giroan buru-belarri murgildu ahalko du nahi duenak, erromeriaz girotua datorkigu eta aurtengo edizioa arratsalde eta gau partean. Dantzari Txikien topaketa izango da, bestalde, goizean, indartzeko herri osoari zabalik izango den bazkaria eta gauean, ikusmin handiena eragiten duen hitzordua, txalotuena, eta zer eskainiko ezagutzeko herria irrikan izaten duen ikuskizuna. "Amets" izena du aurtengoak.
"Atzean lan handia dago"
Konturatzerako hamahirugarren herri sorkuntza lana prestatzen aritu dira hilabeteotan Orbeldiko kideak. Guztiz sustraitua dagoen ekimenera begira, "guri presio puntua eragiten digu, inork ez baitu zalantzan jartzen zerbait egongo denik". Udako oporraldia igarota elkartzen direnean, urtero errepikatzen dute "aurten bai?". Agerikoa izan da orain arteko erantzuna; bai, noski. Aurtengo "Amets" ere hilabeteak daramate ontzen. "Atzean lan handia dago", nabarmendu dute dantza taldetik.
Inauteriak igaro berritan
Oraingoan, gainera, "indarrak neurtu behar izan dituzte". Izan ere, otsailean estreinakoz herri inauteriak antolatzetik datoz. Gustura dira lehen edizioak izandako harrerarekin. "Epe luzera begirako proposamena egin genuen. Eragile desberdinei gustatu zaiela ikusi dugu. Hurrengo urterako ideiak jaso ditugu".
Barne bidaia
Dantza Eguneko emanaldira itzulita, pista gehiegi eman gabe, aurtengoak zer dakarren galdetuta, urte batzuetako komedia kutsutik zertxobait aldenduko direla iragarri dute. Hamahirugarren herri ikuskizunak "pertsona baten barne bidaia" irudikatuko duela aurreratu digute Orbelditik.
Gainerakoan, musikarien eta dantzarien lankidetzatik plazaratuko dute ohi bezala, estreinakoz, "Amets". Aurten, berrikuntza bat; ahots berri bat batuko da emanaldira. Ezaguna izango zaizue irrati-uhinetatik, baita herrian ere. Ikuskizunaren narrazio lanak egingo ditu Garikoitz Udabe Pagola herrikideak. Orbelditik eginiko ekarpenagatik eskertu nahi dute Udabe, baita noski, musikariak eta, nola ez, herriko dantzariak "guk proposatutako guztira animatzen direlako".
Ikuskizunak berak urteotan egin duen barne bidaia horri buruz galdetuta, aldaketarik ere izan du, dantza taldeak egindako bidearen islada izan da baita. "Herriko jende askok parte hartu du. Musikarietan egon da belaunaldi aldaketa. Dantzariei dagokienean, erromeria taldea egonkorragoa da". Halere, talde guztietan izan da aldaketarik, nahiz Dantza Egunak eta Orbeldik bere bideari segida ematen jarraitu.
Usurbilgo 13. Dantza Eguna
Apirilak 5, larunbata
Goizean, 6. Dantzari Txiki: Zarauzko Jalgi eta Lezoko Murixka talde gonbidatuekin:
11:30 Haurren kalejira udaletxetik.
13:00 Haurren emanaldia frontoian.
14:30 Herri bazkaria Askatasuna plazan.
17:00 Ostolaza eta Larrañaga trikitilariak Artzabalen.
22:00 "Amets" ikuskizuna frontoian.
Ondoren, Laket erromeria Mikel Laboa plazan.
Antolatzailea: Orbeldi dantza taldea.
