Gaur, apirilak 29, 19:00etan, Bilbon, Guruzu Plaza Espazioan, Developpe Dantzak Begoña Arroyo Aldekoa eta Ion Beitia omenduko ditu 2026ko Dantzaren Nazioarteko Egunean. Ekimenak Euskadiko dantzagintzan funtsezkoak diren erreferenteen ibilbidea eta ondarea aitortuko ditu, eta antolakuntzaren balorazioaren arabera pertsona horiek “aztarna sakona utzi zuten euskal folklorearen zabalkundean zein belaunaldi berrien prestakuntzan”.
Diogun moduan, omenduko direnak Begoña Arroyo Aldekoa (Bilbo, 1931 – Bilbo, 2025) eta Ion Beitia (Güeñes, 1947 – Bartzelona, 2016) izango dira. Hitzorduan, bi dantzarien familiek oroigarri bat jasoko dute, haien “ibilbidea, ondarea eta euskal folklorearen babesean zein dantzari belaunaldi berrien prestakuntzan egindako ekarpena” goraipatzeko.
Begoña Arroyo Aldekoa dantzaria eta euskal dantza irakaslea izan zen. 1978an Salbatzaile Dantza Taldea sortzeaz gain, bere bultzadari esker, 80ko hamarkadan Bilboko eskoletan euskal dantzak irakasten hastea lortu zen. Eta Santiago Plazako erromerien eta Olentzeroren desfilearen sustatzaile nagusietako bat izan zen.
Ion Beitia dantzari entzutetsua izan zen. Bere ibilbidearen zati handi bat New Yorken egin zuen eta bertan geratu zen Ballets Olaetarekin bira batean aritu ondoren. Gero, Euskal Herrira itzuli zen Leioan bere dantza estudioa sortzeko, eta handik euskal panoramako interprete ezagunak trebatu zituen (Asier Uriagereka, Leire Ortueta, Monica Zamora, Andoni Aresti edo Javier Amo, besteak beste).
