Dantzaren inguruko "Begirada Gurutzatuak" iragaiten dira Miarritzen

2007az geroz, eta Interreg IV A fondoen laguntzaz, Malandain Ballet Biarritz baletak eta Victoria Eugenia antzokiak dantzaren inguruko ekimenak antolatzen dituzte Biarritz eta Donostia artean.

Iaz kultur eragile horien arteko elkarlana ofiziala bilakatu zen Miarritzeko eta Donostiako Herriko Etxeekin izenpeturiko helburu hitzarmenari esker eta Ballet T izena hartu duen Europako lehen "mugaz gaineko koreografia zentroa"ren sortzearekin. Horren helburua "Miarritzetik harago joatea da eta koreografia artearen alde aritzea Euskal Herri osoa kontutan hartuz".

Bestalde, Bilboko Frantses Erakundearen ekimenez, elkarkidetza lan bat hasi da Bilboko Fundicion aretoarekin. Lehen proiektua azken honek proposaturiko bi dantza konpainia aurkeztea izanen da : Natxo Montero eta Organik. Bi konpainia hauen inguruan, tailerrak, errepika publikoak eta ikusgarriak antolatuak izanen dira Lapurdin.