Dantzaren eguna

dFERIA

Gazteszenako agertokian, beste gogoeta pertsonal baten emaitza etorri da Mirella Carbone perutarraren eskutik. Carbone, dudarik gabe, heziketa klasikoa duten artista menderakaitz horietariko bat da, eta bere hogei minutuko performance-an arte eszenikoen hizkera ia guztiak erabili ditu -objektuen maneiua, mimoa, transformismoa, ikusleekiko harreman zuzena eta ausarta, kalitate handiko gorputz-mugimendua...-0, perfekzio handiz erabili ere, eta emanaldian zehar berak bizi izandako tentsio izugarria gugana igortzea lortu du.

Victoria Eugeniako emanaldian Mirando al Sur izeneko programa bikoitza aurkeztu da Costa Rica eta El Salvadorreko Dantza Konpainia Nazionalen eskutik, bien ildo nagusia AEBetara doazen migrazioen fenomenoa izanik. Costa Ricakoan nekazari itxurako dantzariak eta leku batetik bestera eramandako fardel handiak izan dira protagonistak, eta soinu bandan oratorio barrokoak, indiar kantuak, perkusioa, piano musika eta gaizki sintonizatutako irratiak entzun ditugu. Bitartean, dantzariek ekintza sinbolikoak eta irudi plastiko interesgarriak osatu dituzte, baina nik behintzat ezin izan dut harrapatu diseinu koreografikoaren zentzu ezkutua.

El Salvadorgo konpainiaren proposamenak, ordea, muturreko jarduera fisikoaren eremura eraman gaitu, eta itxura kaletarreko dantzariek dantzarako eta akrobaziarako gaitasun itzela erakutsi dute, soinu industrialen eta intentsitate handiko erritmoen pean. Koreografia makineria hipnotiko eta artegagarri baten modura ibili da eta gauza asko esatea lortu du ia elementu narratiborik erabili gabe.

Azkenik, Itinerarte proiektuaren barruan Argentinako Desdichado deleite del destino konpainiak izenburu bereko lana ekarri du. Taula gainean aita tiraniko bat, bere menpe dagoen alaba eta kale-saltzaile bat agertzen dira, eta hiruren arteko harremanetatik hango jende arruntaren ohiko bizimodua eta kezkak azaleratzen dira. Hasiera makala kenduta, norabide egokitik ibili da emanaldia, baina, hala ere, nik gehiago espero nuen argentinar testu garaikide batetik eta hango antzezpenen maila mitikotik.

 Konpainiak: Teatr Okazjonalny, Mirella Carbone, Costa Rica eta El Salvadorgo Dantza Konpainia Nazionalak, Itinerarte. Data: Uztailak 3.