Dantzan berritzailea izan da Maurice Bejart koreografoa. Zegoenarekin hausten saiatu zelako polemika bat baino gehiago eragin zuen. Atzo hil zen, Lausanan (Suitza), 80 urte zituela.

Aitari esker sartu zen dantzaren munduan, 13 urte zituela. Parisen filosofia ikasketak egin arren, dantza ez zuen inoiz albora utzi.

50eko hamarraldian hasi zen koreografo lanetan, eta berehala sortu zuen bere konpainia. «Interpretazioaren esentzia aurkitzen saiatzen naiz», esan zuen behin bere konpainiaz galdetu ziotenean. Dantzari aparta zen adituen esanetan. 200 koreografia baino gehiago sortu zituen guztira, baina ez zen, hala ere, dantzaren jabe sentitu: «Dantzaren lehen zerbitzaria da koreografoa, inondik ere ez dantzaren jabea».