Dantzarekin buru-belarri

Patxi Montero - Dantza irakaslea

Oraingo aste bukaeran, zer?

Aste bukaerak jarduteekin lotzen ditut gehienetan, izan dantza (aste bukaeran Errenteriara noa) edo izan eskola: oraingoan Habori eskolarekin lotutako ekintzak Andaluzian direnez, etxeko lanak egin, familiarekin elkartu –Elene iloba txikiaren urtebetetze ospakizuna daukagu– eta lagunekin egoteko aprobetxatuko dut.

Zelako dantzak erakusten dituzue Eskoriatzan?

Munduko dantzen barruan edozein lekutako folkloreko dantzak sartzen dira. Hala ere, batez ere Europa aldekoak dantzatzen ditugu, baita Armenia, Israel, Mexiko edo AEBetakoak ere. Parte hartzeko dantzak dira, ez ikustekoak. Talde izpiritua lantzeko zirkuluan, denok elkarrekin dantzatzeko moduko dantzak dira, aproposak edozeinek dantzatzeko. Dantzak ikasten jarraitzea ere oso gustuko dut; adibidez, Aste Santurako badaukat plana Errusiako dantzak ikasteko, eta momentuan Euskal Herriko plazako
dantzak ikasten nabil martitzenero, Durangon.

Kazetaritza eta musika alde batera lagata orain, ala?

Lagata ez, baina aldatuta. Musika, dantzen bitartez lantzen dut orain. Eta Habori eskolarako kazetaritza lanak ere egiten ditut, komunikazio arduradun gisa.