Dantzan, atseginen baratzean

Jeronimo Bosch Herbehereetako margolariaren Atseginen baratzea lanean oinarrituriko dantza ikuskizuna taularatuko du gaur Blanca Li dantzariaren konpainiak, Iruñean.

Paradisua, mundua eta infernua erretratatu zituen Boschek XV eta XV. mendeen arteko urteetan, data ez baitago argi. Boschen irudimenetik mota guztietako munstroak eta zentzugabeko egoerak atera ziren.

«Nire lanetan beti saiatzen naiz hainbat unibertso nahasten», dio Blanca Li koreografoak Atseginen baratzea ikuskizuna azaltzeko. Pertsonaiak nahasi egiten dira, puzzle gisa antolaturiko gune batean, kanpoan apokalipsia nagusitzen den bitartean. Boschek bere garaia erretratatu zuen, eta Liren lanak hura erabiltzen du gure garaia dantzaz deskribatzeko.

Bederatzi dantzarirentzako eta piano jotzaile batentzako lana sortu du Lik. Anthony Cazaux, Jean-Gerald Dorseuil eta Geraldine Fournier dira dantzarietako hiru. Li bera ere haiekin dantzatzen da. Jeff Cohen eta David Saliamonas pianoan txandakatzen dira. Eve Rambozek eginiko film bat erabiltzen dute, atzeko irudi gisa.

Montpellierko Dantza Jaialdiaren barruan sortu zuen Lik lana, 2009. urtean. Espainiarra da sortzailea, Granadakoa, baina Frantzian bizi da 1992. urtetik.

'ATSEGINEN BARATZEA'

Noiz. Gaur, 20:00etan, Gaiarre antzokian.