Dantza tradizionaletan trebatzeko ikastaroak emango ditu Aikok

Dantzarako plazak sortzeko helburuarekin, dantzaldi ibiltariak abiaraziko ditu Bizkaian eta Gipuzkoan, urrian

Irailean, doako erakustaldiak egingo dituzte Bizkaiko bederatzi herritan, hala nola Lemoizen, Erandion, Durangon, Sopelan, Berrizen eta Elorrion. Eta urrian, ikastaroak hasiko dituzte Erandion, Galdakaon, Durangon, Sopelan, Gernikan, Zaratamon. Gipuzkoara ere hedatuko dute ekimena; Zarautzen egingo dute lehendabizikoz, orain arteko filosofiari eutsita: «gozatuz ikastea eta ikasiz gozatzea».

Aikoko dantzariek dantza tradizionalak irakatsiko dituzte, «modu alai eta dibertigarrian». Errepertorio zabalarekin jokatuko dute, estilo askotariko piezak landuz: sokadantza, jota, pasodoblea, balsa, mazurka, porrusalda, txotisa, jauziak...

Ikasitakoa praktikan jartzeko, erromeria antolatuko dute hilero Durangoko Plateruena kafe antzokian. Izan ere, Aikoren helburuetako bat da erromeria tradizionalek garai bateko nagusitasuna berreskuratzea, eta plazek gero eta dantzari gehiago erakartzea.