Dantza klasikoko banakako eta taldekako nazioarteko lehiaketa, BBK Salan

Developpe Dantza Elkarteak, BBK-k, Bilboko Udalak eta Bizkaiko Foru Aldundiak antolatu dute, eta ekimenaren aurkezpenean azaldu dutenez, helburua da dantza eskolak, dantza taldeak eta modu independentean lehiatzen diren pertsonak biltzea, «dantzaren indar kulturala eta sustraitzea erakusteko, dantza ikasleen eta profesionalen arteko topaketa sustatzeko eta laguntzeko, eta talentu gazteak bilatu eta dantzaren munduan beren ibilbidea bultzatzen laguntzeko».

Horrela, eskola profesional eta pribatuetako, ballet klasiko eta garaikide, dantza moderno, street dance, jazz, fun eta euskal dantza taldeetako ikasleei zuzenduta dago. Parte hartzeko gutxieneko adina 10 urte eta handiena 19 urte da banakako dantza klasikoaren kategoriarako, eta taldeen kategorietarako, gutxieneko adina 10 urte da, gehieneko mugarik gabe. Taldeak gutxienez lau eta gehienez hamar lagunekoak izango dira.

Epaimahaia nazioartean ospe handia duten bost pertsonak osatuko dute, eta horien artean daude Charles Jude Parisko Operako izarra, Lifar Fundazioko presidentea eta Nureyev Fundazioko Zuzendaritza Kontseiluko kidea, Leire Ortueta Royal Ballet School-eko maistra eta Royal Ballet-eko dantzaria, eta Monica Zamora Birmingham Royal Ballet-eko dantzari nagusia.

Sariei dagokienez, diploma-garaikurraz eta diruaz gain, ikastaroak eta ikasketak ere izango dira, hala nola Maria de Avilaren Goi Mailako Dantza Kontserbatorioan, Bartzelonako Corella Dance Academy-n, Kanadako Alberta Balletean eta Erromako Ballet eta Opera Eskolan. Parte hartzaile guztiek parte hartu dutela egiaztatzen duen diploma eta opari bana jasoko dituzte.

Lehiaketaren egunetako goizetan klase magistral irekiak izango dira, lehiaketan parte hartzen dutenentzat zein edozein estilo edo formatan dantzarekiko pasioa eta ikasteko interesa duen edonorentzat. Era berean, BBK Salan hurbiltzen direnek klasearen garapena ikusteko aukera izango dute.

Lehiaketa amaitzeko, publikoari irekitako gala handi bat egingo da, non, finalistez gain, nazioartean ospe handia duten artistek ere parte hartuko duten. Txapelketaren araudia, izena emateko formularioa eta berrikuntza guztiak developpedantza.eus webgunean daude.