Dantza jaialdia Ezpeletan

Ezpeleta (Lapurdi) prest dago bere kaleak munduko dantzez alaitzeko bihar hasi eta uztailaren 20ra arte. Gauargi festibala hamalaugarren aldiz egingo dute aurten, eta hainbat herrialdetako haurrek hartuko dute parte.

Munduko dantza tradizionalez gain, dantza garaikideari ere tartea egingo diote aurten, Peio Serbielleren eskutik. Zuberoako kantariak, Grenobleko (Frantzia) Les Mutins antzerki konpainiarekin elkarlanean, Sokamets ikuskizuna aurkeztuko du ostiral eta larunbatean.

Euskal Herriko hainbat gaztetxoren dantza talde ariko dira taula gainean: Larraineko Errege Txopitak (Zuberoa), Hazparneko Elkar Oinka (Lapurdi) eta Ezpeletako Ezpela. Talde horiez gain, Errumaniako, Mazedoniako, Ukrainako eta Frantziako taldeek ere beraien dantza tradizionalak aurkeztuko dituzte.

Mugerrera, Kanbora, Hazparnera eta Milafrangara zabalduko dute jaialdia azken egunean, aurtengoari amaiera Ezpeleta inguruko herrietan emateko.