Dantza ikusgarria eta mus txapelketa ikastolatik kanpo

 Azaroaren 23an Ortzaizeko ikastolak mus txapelketa bat antolatu du Bidarrainen. Igande arratsaldez, bietatik goiti iraganen den lehiaketan izena emaiteko 12 euro pagatu behar da eta irabaziko dutenak 600 euro lortuko dute. Modu berean, bigarren saria irabaziko duenak asteburu bat irabaziko du. Antolatzaileek adierazi dutenez, helduentzako zuzendua den aktibitate honetaz gain, 14 urte baino gutxiago duten gazteei ere txapelgo berezi bat antolatua izanen da.

Dantza ikusgarria
Urruñako ikastolak eta Ziburuko Piarres Larzabal kolegioaren alde, Urruñako polikiroldegian azaroaren 30an, igandearekin "Haizeari" dantza ikusgarria eskeiniko da. Hitzordua 16.30etan hasiko da eta emanaldian txalapartariak ikastolako haurrak izanen dira.

"Haizeari" dantza ikusgarriak 1600.urtean euskaldunek kortsarioak bilakatzeko bete behar zituzten baldintzak, trebetasuna eta testuinguruaren islapena da. Ikusgarriari esker 1600 eta 1800 urtera bidaiatuko du ikusleak garaian kortsarioen inguruko lanbidea aipatzeko. Euskal dantza tradizionalean oinarrituz, garaiari egokitako musika eta jantziekin ikusgarria girotuko dute.

Bestalde, Urruñako ikastolak eta Piarres Larzabal kolegioak antolaturik Goierriko ikastolen laguntzarekin, "Pirritx Porrotx eta Marimotots" Ordizian ikusgarria ikusteko autobus bat antolatu dute. Bidaiaren garraioa urririk izanen da eta 14.30etan abiatuko da, 20.00etan itzultzeko. Ikusgarriaren sarrera zazpi eurotan eskuratzen ahal da 05 47 75 07 02 telefono zenbakian.

Haizeari dantza ikusgarriaren dantza taldea. Argazkia ??Meek fest taldea.