Dantza Hirian, ekitaldi ugarirekin

Igandean izango da herrian bigarren aldiz

Iazko "esperientzia polita" errepikatu nahi izan dute herrian. Jon Maya Kukaiko kideak adierazi duenez, bi aldeak (Kukai eta Errenteriako Udala) pozik geratu ziren.

Celine Petrissans Dantza Hirianeko Komunikazio arduradunak azaldu duenez, hiri paisaietako dantzan dago zentratuta jaialdi hori, eta horrez gain, jendearengana hurbildu nahi dute dantza garaikidea.

Petrissansen arabera, herriko lau toki aukeratu dituzte dantza ikuskizunak egiteko, eta modu horretara dantza eta arkitekturaren arteko harremana bilatzeko: Herriko Enparantza, Zumardia, Foru Plaza eta Xabier Olaskoaga plaza.

Lau dantza konpainia, lau tokitan
Horietan lau dantza konpainiek hartuko dute parte: Errenteria-Oreretako Kukaik, Manchesterko (Erresuma Batua) Chamaleon (master classa ere emango du), Bilboko Organik eta Bartzelonako De Reves.

Lau dantza konpainia horiek estilo anitzak eta eklektikoak eskainiko dituztela adierazi du Petrissansek. Ikuskizunak 15-20 minutukoak izango dira, "jendea ez aspertzeko"

Gaineratu du ez dela soilik dantza jaialdi bat izango. Izan ere, ostiralean Kukai Dantza Konpainiak 4-11 urte arteko eskola umeentzako ikuskizuna emango du. Modu horretara, dantza garaikidea ezagutaraztea da euren asmoa. Nabarmendu du eurentzako oso garrantzitsua dela hori.

Bestetik, master classa izango da igandean bertan. Manchesterko Chamaleon konpainiak emango du, eta irekia izango da. Dantzan esperientziaren bat daukan jendeari zuzenduta dago. Dohainik izango den arren, Dantza Hirianekin harremanetan jartzea komeni da aurretik, izena emateko. Ildo horretatik, ekitaldi guztiak dohainik izango direla nabarmendu dute antolatzaileek.