Dagestango dantzak Getxon

Getxoko Dantza eta Folklore Jaialdiaren 26. aldia hasi zen atzo Getxon Indiako Panghat taldearekin. Gaur Dagestango dantzak ikusteko aukera izango da Algortako Biotz Alai plazan, 21:00etan, eta sarrera doakoa izango da.

Lezginka dantza taldearen eskutik, Kaukasoko Dagestango Errepublikako dantzak izango dira. Taldeak lezgi etniaren dantza ospetsu baten izena hartu du.

Konpainia 50 urtean jardun da, Tamkho Izrailovek, Dagestango Folklore Akademia Nazionaleko dantza taldearen artista handienetako batek sortu zuenetik.

Bihar Getxoko Itxartu taldeak itxiko du jaialdia datorren urtera arte, eta ekitaldi hori ere Algortako Biotz Alai plazan izango da.

Elkarte horren dantza taldeak euskal dantza eta kulturaren aldeko lana egiten du, eta sortu zenetik, 1976.urtetik, dantzaren berrikuntza eta freskotasuna bermatzen du irakaskuntza goiztiarra dela medio.

Elkarteak Iñaki Uriaren eskutik eman zituen lehenengo pausuak. Dantza taldearen egitura eta lana denborarekin garatuz joan da. Gaur egun, 40 kidek osatzen dute taldea, helduak zein gaztetxoak kontuan hartuta.

GETXOKO DANTZA ETA FOLKLORE JAIALDIA

Non. Algortako Biotz Alai plazan.

Noiz. Gaur eta bihar, 21:00etan.