Brasilgo faveletako dantzariak

Frantziako Kaefig konpainiak Rioko 11 dantzari ekarri ditu Euskal Herrira, bi pieza estreinakoz taularatzeko

Correria du izenburu lehen lanak. «Konturatu gara arin bili behar dugula Mouradekin pieza bat sortzekotan», azaldu du Diego Gonçalves dantzarietako bat eta Brasilgo taldearen arduradunak. «Correria da gure eguneroko bizimodua: denboraren kontrako gerra, laster batean bazkaldu, amen batean jantzi, eta azkar baino azkarrago ibili egun bakoitzean egin beharrekoa egin ahal izateko...». Norbaitek uste bazuen Brasilen ez dagoela estresik, dantzariek arnasestuka utziko dute. Indar akrobatikoen erakustaldia da lana, hip hopetik gertukoa.

Agwa pieza uraren inguruko koreografia da. Ura ikur gisa hartuta, dantzariek mugimenduak isurtzen dituzte agertokian. Saltoka eta biraka aritzen dira, makila luzeen laguntzarekin. Lan gogorrak sorturiko egarria ura edanez asetzen dute. Konplexurik gabe nahasten dituzte hip-hopa, capoeira, musika elektronikoa eta bossa nova. Elkarlanean dabiltza Frantziako eta Brasilgo sortzaileak, riotarrek 2006ko Lyongo Dantza Biurtekoan ikusleak aho bete hortz utzi zituztenetik.

'CORRERIA' ETA 'AGWA'

Kaefig konpainia. Gaur, 20:00etan, Euskalduna jauregian (Bilbo).