Goizeko lehen ordutik giro aparta izan zen Zamudion. Dantzariak kalejiran irten ziren futbol-zelairaino eta han dantzen agerraldia egin zuten: besteak beste, Dantzari dantza, Ibarzabal-Arku dantza, Eltziegoko dantzak, Gorulariak, Kaixarranka eta Larrain dantza dantzatu zituzten. Ondoren, herriko tabernak, landak eta plazak, baita Parke Teknologikoko zelaiak ere, bete zituzten indarrak berritzeko eta bazkaltzeko. Ilusioa eta ospatzeko gogoa zegoen eta hori nabaria izan zen egun osoan. Eguzkia ere gogotsu, bero handia egin zuen atzo eta DYAko osasun-langileek pertsona batzuk artatu behar izan zituzten bero-kolpeen eraginez.
Ospakizuna biribiltzeko, erromeria egon zen Luhartz taldearen eskutik eta plaza leporaino bete zen; orratz bat ere sartu ezin. Parranda 20:30ak arte luzatu zen. Izan ere, lehen aipatu moduan, ospatzeko gogoa zegoen.
