Bikote harremana eta dantza

Suitzako 7273 konpainiak musikarik gabeko koreografia sinple bezain indartsua aurkeztuko du Bilbon

Maitasun harremanak edo, hobe esanda, maitasun-gorroto harremanak hartu dituzte gai gisa azken sorkuntza lan honetarako. Isiltasunean egiten dute dantza, 45 minutuz elkarren inguruan. Elkarri heltzen, elkarren arteko harremanaz mugimenduekin mintzatzeko. Mezua unibertsala da, ordea: bikote ororen inguruko ikuskizuna da.

Maitasun mota guztiak aztertzen dituzte piezan, bikote posible oro. Eta, halere, harreman estereotipatuetatik ihes egitea lortzen dute.

La Vision du Lapin, Simple Proposition, On Stage eta Merry-Go-Round dira, besteak beste, taldeak azken urteotan aurkeztu dituen egitasmoak. Climax piezarekin, arteak laguntzeko Lietchi fundazioaren saria irabazi zuten. Genevako hiriaren zein Suitzako beste hainbat erakunderen laguntza dute.

Dantzaren esanahiaren bila dabilen konpainia gisa deskribatu dute. Yadi eta Cantillon dantzariek beraiek sortu dute ideia eta koreografia.

'ROMANCE-S' 7273 KONPAINIA

Noiz. Gaur, 20:00etan, La Fundicion aretoan, Bilbon (Francesc Macia, 1).