Bidarraitarren arteko lotura indartu duen kabalkada

Urduritasuna nabaritzen hasia da Bidarraiko herritarren artean. Azken hilabeteetan ikasitakoa plazaratuko dute irailaren 24an estreinatuko duten kabalkadan. Urduri izateaz gain, motibatuak daude. Proiektu honi esker, herritarren arteko lotura indartzea lortu du Otxaldetarrak elkarteak. Etorkizunari begira, harreman hori garatzeko xedea du.

Ehun bat dantzari, musikari baita jostun ere batu dira Kabalkada prestatzeko. Herriko elkarteak luzatutako deialdiari baikorki erantzun dio herriak. Antton Seychalek elkarteko kideak azaldu duenez, aspalditik buruan zuten ideia zen. "2002an kabalkada bat egin genuen toberak gabe. Hamabost urte emanaldi bat antolatu dugu", azaldu du.

Proiektua zerotik abiatu dute bidarraitarrek. Hain zuzen, ez dago musika, dantza edo antzerki talderik herrian. Hala ere, ez dira bakarrik egon egitasmoaren muntaketarako. Inguruko herriek, hala nola, Itsasu eta Irisarrik laguntza eskaini diete. Gisa berean, nesken jantzien prestaketarentzat Baigorri, Getari, Lekorne, Zuraide baita Arnegik ere beren ekarpena egin dute.

Ideiaren berri eman zieten herritarrei 2016ko martxoan. Kattalin Sallaberry eta Peio Jorajuriak antzerkia idatzi dute, Jokin Irungaray taula zuzendaria izanen da eta Bixente Ciaurriz dantzaz arduratu da. Elkarteak azaldu duenez, "herritarren jarrera desegokiak salatzen dituen ikusgarria da". Aipatuko dituzten gaiak gaurko biziari lotuak direla dio.

Lotura indartu

Euskal kulturari lehentasuna emateaz gain, herritarren arteko kohesioa indartu nahi izan dute kabalkadaren bidez. "Helburuetariko bat zen: lotura sendotu eta Bidarraiko plaza dinamizatu maiz elkartuz", aipatu du Seychalek. Irriz gehitu duenez: "faltan botatuko dugu elkar. Astero bi aldiz elkartu gara urte bat baino gehiagoz. Horrek segida bat izan beharko luke".

Kabalkada oraindik eskaini ez badute ere, etorkizunari buruz pentsatzen hasia da elkartea. Hain zuzen, aipaturiko harremana indartzeko aktibitateak eskaintzea pentsatu du erakundeak. Azpimarratzekoa da lotura hori adin guzietako herritarren artean ikusi dela. Kabalkadan 11 eta 78 urte bitarteko parte hartzaileak presente dira, hain zuzen.