Dantzari onak daude Aiert Beobidek zuzentzen duen Haatik dantza konpainian. Bost dantzari aritu ziren, ortozik, atzoko emanaldian, eta haiekin batera Unai Elizazu gai-jartzailea.
Ordubete inguruko saioan askotariko bertsoak, doinuak, gaiak eta dantza estiloak eskaini zituzten. Dantzariak saiatu ziren gorputzaren mugimendua bertsoen esanahiarekin lotzen eta gai-jartzailea, berriz, euskal bertsogintzako errima gogoangarrietako asko ekartzen.
Nahi duten neurrian eta erritmoan dantzatzeko gai dira Haatik taldeko dantzariak, eta ikusleentzako ariketa polita izan zen grabatutako bertsoak entzutea eta jarraitzea dantzarien espresio mugimenduekin lotuz.
1967ko bertsolari txapelketa nagusian Xalbadorrek botatako bertso entzutetsua, ispiluaren aurrean Lazkao Txikik zortziko handian botatako hiru bertsoak, 2zio taldearen Nor nintzen ni edota Thierry Biskariren 100 alargunen dantza entzun eta dantzatu zituzten, besteak beste, emanaldian.
Bestelako doinuak eta dantzak ere eskaini zituzten dantzariek, tartean soinu txikiarekin jo eta mahai gainean arratiar erara dantzatutako fandango ederra.
