Beteranoen III. Dantza Sueltoko Topaketan, Patxi Larrea omenduko dute

Topaketa horretan, Patxi Larrea omenduko dute Beti Prest taldekoek, “dantzari eta dantza irakasle bezala egin duen ibilbide oparo eta luzeagatik”  azaldu dute antolatzaileek. Larreak  Lezon dantza zabaltzeko egindako lana nabarmendu dute antolatzaileek:”25 urte eman ditu ilusioz lan egiten  Lezon dantza zabaltzeko eta horregatik dantzari  dotore eta irakasle nekaezin honen ibilbideaz gozatu duten guztiak animatu nahi ditugu omenaldian parte hartzera”.
Egun osoko egitaraua
Antolatzaileek egun osoko egitaraua prestatu dute biharko. Herriko Enparantzan  egingo diete harrera topaketako parte hartzaileei 11:00etan. Ordu erdi beranduago , Dantza soltearen garapena Bizkaian mahai ingurua egingo dute udaletxeko areto nagusian, Jose Ignazio Ansorena, Patxi Larrea, Iñaki Mugarra eta Arkaitz Pascuasekin. Moderatzaile lanetan, berriz, Joxe Juan Ugalde arituko da.  Jaurtakol Plazan, mokadutxoa emango diete ondoren, hurbiltzen direnei 13:30etik aurrera.
Amulleta elkartean bazkaldu ondoren, 19:00etan hasiko da dantza ikuskizuna. Orereta ikastolatik abiatuta, erdialdeko kaleak zeharkatuko dituzte dantzariek, Zumardian amaitzeko. Dantza solteko ikuskizuna eskainiko dute  bertan parte hartuko duten 11 bikote beteranoek. Bikote horietatik bi nafarrak dira; bi arabarrak; eta zazpi gipuzkoarrak. Ikuskizuna amaituta egingo diote omenaldia Patxi Larreari. Besteak beste, Xabier Obesok egindako  Dantza izeneko eskultura jasoko du dantzari lezoarrak.

Dantza Sueltoko topaketa