Edukira salto egin | Salto egin nabigazioara

Tresna pertsonalak
Hemen zaude: Hasiera Hemeroteka Beren kabalkada prestatzen dute Gamartek, Ainiza-Monjolosek eta Lakarrak

Dokumentuaren akzioak

Beren kabalkada prestatzen dute Gamartek, Ainiza-Monjolosek eta Lakarrak

Gamarteko, Ainiza-Monjoloseko eta Lakarrako herritarrak elkartu dira dantza, antzerkia eta kantua nahasiko duen ikusgarri bat antolatzeko xedez. Proiektua prestatzen ari badira ere, emanaldiaren datak finkatu dituzte jada. Kabalkada abuztuaren 23 eta 30ean proposatuko dute Ainiza-Monjoloseko plazan.
Egilea
Iurre Bidegain
Komunikabidea
Naiz
Mota
Albistea
Data
2019/02/01
Lotura
Naiz

Aspalditik desagertutako ohitura bat berreskuratzekotan dira Gamarten, Ainiza-Monjolosen eta Lakarran. Badira zenbait urte hiru herrien artean antzerki talde bat sortu zutela. Galdutako dinamika bat zen, baina badira bi urte ohitura berreskuratu eta bertako herritarrak kabalkada bat sortzeko helburuz lanean jarri direla. Emanaldia abuztuaren 23 eta 30ean eskainiko dute Ainiza-Monjoloseko plazan.

Guz_cavalcade_bobedme112

Bidarraiko herritarrek ere beren kabalkada sortu zuten. ©Bob EDME         

Ideia hastapenetik argi dute bultzatzaileek. Hots, antzerkia, dantza eta kantua nahasiko duen ikusgarri bat eskaintzea. Asmo hori ardatz hartuta, herritarrek hiru arloak lantzeko ikastaldiak antolatu dituzte azken bi urte hauetan.

Iragan abenduan, bilkura bat prestatu zuten proiektua publikoki aurkezteko. Bixente Oillarburuk nabarmendu duenez, jendearen parte hartzeko nahia berehala sentitu zen. "Nahiz eta bi urte hauetan engaiamendua apaldu den, azken asteetan aldaketa bat ikusi da. Orotara, 70 bat pertsonak parte hartu zuten azken bilkuran. Hiru herrietako eta belaunaldi guztietako pertsonak dira", azaldu du. Heldu den hitzordua otsailaren 15erako finkatu dute egitasmoaren bultzatzaileek.

Harremanak sendotu

Proiektuaren hurrengo urratsa parte hartzaileen zerrenda egitea izanen da. Hala ere, gazteak aitzinatu duenez, "hamabost bat pertsonak antzerkian parte hartuko dute, berrogei bat lagun dantzari gisa arituko dira eta kopuru bera izanen dugu kantarien taldean". Antzerkia Jean-Michel Nobliak idatzi duela aipatu du.

"Gure lehen helburua hiru herrietako biztanleen arteko loturak sortzea da. Gaur egun, jadanik aktibitate batzuk antolatuak dira, hala nola, bazkariak edo gaualdiak, baina urrunago joan nahi dugu", dio. Hots, proiektuak herritarrei beren artean gurutzatzeko parada eskaini nahi die.

Dokumentuaren akzioak