Luis Alberdi 'Beltza' gustura, asteburuko dantza jaialdiarekin

Dantza eskolak ematen 25 urte daramalatza-eta, emanaldi berezia eskaini zuten Izarraitz pilotalekuan

Aspalditik zeukan 'Beltza'k horrelako zerbait egiteko gogoa, eta eskola ematen 25 urte bete dituenez, aitzakia polita izan du bere ikasle diren dantzariak biltzeko. Urduritasunak alde batera utzi zituen, eta, guztia pasa ondoren, gustura agertzen da emaitzarekin. «Orain oso lasai nago, baina jaialdi egunean ez nengoen hain lasai. Gauzak nola atera diren ikusita, ordea, oso gustura nago», dio 'Beltza'k.

Dantza pieza asko ikusi ahal izan genituen eta adin guztietakoak. Gainera, egun horretarako bereziki arropa berriak jantzita zeuden guztiak. «16 arropa berri egin genituen mutilentzat eta 20 neskentzat. Bagenuen kezkarik alde horretatik, baina asko luzitu zuten arropak eta gustura egoteko beste arrazoietako bat da», dio Alberdik.

150 haur inguru ditu dantza ikasten, eta ia denak izan ziren Izarraitz pilotalekuan. «Zortzi edo hamar ume besterik ez ziren falta izan.», dio 'Beltza'k, pozik.

«Hankak martxan» dituen bitartean, beste 25 urtean dantza erakusten jarraitzeko asmoa duela dio Alberdik. Datorren urrira arte ikasleekin atseden hartuko du, baina dantza txapelketak dituzte orain. Asteburuan bertan, bi ikaslek, Nagore eta Iñigo Larrañagak, horietako bat irabazi dute Irunen.

Bestalde, igandean saloiko dantzen erakustaldia izan zen Azpeitia Dantzan ekimenaren barruan, eta han ere hartu zuen parte 'Beltza'. «Dantza egitea gustatzen zait eta saloikoekin ere atrebitu naiz. Urrian hasi nintzen eta larunbatero entsaioak egin ohi ditugu, oso gustura nabil».