Belaunaldi arteko antzerki eta dantza ikastaroak egingo dituzte Getxoko GureGune gaztelekuan

Getxoko Udaleko Gizarte Kohesio arloko Gazteria eta Zahartze Aktiboko zerbitzuek belaunaldi arteko doako antzerki eta dantza tailerrak antolatu dituzte 18 urtetik gorakoentzat, Romoko GureGune gaztelekuan. Martxoan hasiko dira saio hauek eta helburua da leku berean «denborak banandutako baina antzerkiak eta dantzak elkartutako belaunaldiek» elkartzeko espazio bat izatea.

Carmen Diaz Zahartze Aktiboko zinegotzi arduradunak eta Mihaela Jilavu Gazteria Zerbitzuko zinegotzi arduradunak adierazi dutenez, «bi ikastaro hauen bitartez, adin desberdinetako pertsonen arteko harreman eta lankidetza esperientziak ahalbidetu nahi ditugu, norberaren eta taldearen aberastasunari laguntzeko, eta horrela, kohesio eta garapen komunitarioari modu aktiboan laguntzeko».

«Gainera, bada modu bat ere gure gizartean hainbeste nabarmendu diren sedentarismoari, bakardadeari, indibidualismoari eta tristurari aurre egiteko», gaineratu dute.

Antzerki ikastaroa hilabete bakoitzeko lehen eta hirugarren astelehenetan egingo da, eta dantza-ikastaroa (saltsa eta bachata), hilabete bakoitzeko bigarren eta laugarren astelehenetan, biak ala biak 18.00etatik 19.30era.

Lekuak mugatuak dira, eta euskarazko zein gaztelaniazko aukeretan eman daiteke izena. Izen-emateak aste honetan bertan zabaldu dituzte, Romoko gaztelekuan, gaztebule-goa@getxo.eus helbide elektronikora idatziz edo 688 88 09 85 telefonoaren bidez egin ahalko dira.