Bejart gozatzeko hiru aukera

Koreografo frantses zenaren konpainia Donostian ariko da gaur eta bihar, eta Miarritzen heldu den asteartean

Bejart Ballet Lausanne konpainiak 23 urte darama Bejarten koreografiak mundu osoan zabaltzen, arrakasta handiz. Bejart hil zenez geroztik Gil Romanek zuzentzen du konpainia. Bejart maisuaren konfiantza osoa zuen Romanek, eta haren borondatea jarraituz hartu zuen konpainiaren zuzendaritza.

Gustav Mahlerren Hirugarren sinfonia-ko 3, 4 eta 6. mugimenduekin emateko sortutako koreografia da Ce que l'Amour me dit (Maitasunak esaten didana). Sonate à trois (Sonata hirurentzat) Bela Bartokek bi pianotarako eta perkusioarentzako sortutako sonatarekin ematekoa da. Igor Stravinskiren izenburu bereko musikarekin emateko sortua da L'Oiseau de Feu (Suzko txoria).