Goizeko zazpietan jarri dira martxan puska biltzaileak. 40 pertsona inguru elkartu dira, behor eta guzti, baserrietara bisita eginez, eta dantzak eta musika eskainiz. Elkartean txokolatea hartu ondoren, abiatu dira baserriz baserri. Txistulari bezala aritu da Alxarte Aiestaran gaurkoan: «Itziarrek eskatu zidan ea doinuak erakutsiko nizkion, eta gero bera ateratzen bazen, ni ere aterako nintzela. Gero Olatzi komentatu genion, eta hiru emakume atera gara txistulari bezala». Bederatzi doinu jotzen dituzte, eta txandakatuz joaten dira baserri bakoitzean bat edo bi eskainiz.
Etxe-zahar baserrian geldialdia egin dute, hamaiketakoa hartzeko, eta horren ondoren arin-arina, fandangoa eta kalejira dantzatu dituzte. Hor zenbait txantxo ere animatu dira dantza egitera. Segizioaren atzetik behorra joan da, eta berak eraman ditu baserrietakoek emandakoak.
Herrigunean, bitartean, eguerdian hasi dira mozorrotuen desfilearekin txarangaren doinuez lagunduta, eta gero elkartzekoak ziren dantzari, txistulari eta txantxoekin Arrateko zubian. Jarraipena herri bazkari autogestionatuarekin ematekoak ziren, herriko frontoian.
